काठमाडौँ – अमेरिकी राष्टपति जो बाइडेनले ओमिक्रोनको नयाँ भेरियन्ट ‘बिए.५’अमेरिकामा पनि भेटिएकोले सतर्क रहन नागरिकहरुलाई आग्रह गरेका छन्।

बुधबार उनले भनेका छन् – ‘अहिले अमेरिकामा पनि सो भेरियन्ट भेटिएको र देशव्यापी रुपमा नै विस्तार भइरहेको छ, त्यसैले यसबाट बच्नका लागि सबैले सतर्कता अपनाउन जरुरी छ ।’

उनले यसबाट आफू पनि संक्रमित हुन पुगेको बताएका छन् । राष्ट्रपति बाइडेनले भने- ‘यो ‘बिए.५’ नयाँ भेरियन्टबाट म संक्रमित हुन पुगेँ, म मात्र होइन अमेरिकीहरु पनि यो संक्रमणबाट संक्रमित भएका छन् र हामी अमेरिकी मात्र नभएर संसारकै नागरिकमा यो संक्रमण फैलिएको छ ।

उनले जनस्वस्थ्यका मापदण्डहरु अपनाउन पनि सबैलाई आग्रह गरेका छन् । सार्वजनिक स्थलमा जाँदा अनिवार्य रुपमा मास्क लगाउन भनेका छन् ।

अमेरिकी राष्ट्रपति बाइडेन ७९ वर्षका छन् । उनलाई गत हप्ता मात्र यो नयाँ भेरियन्टको संक्रमण देखिएको बताइएको थियो । उनले आफूलाई सामान्य लक्षण मात्र देखिएको जनाएका थिए । उनी एकहप्ता पछि बुधबार मात्र आइसोलेसनबाट निस्किएका छन्।

कोभिड १९ संक्रमणले सबैभन्दा बढी असर पारेको अमेरिकामा पछिल्लो समयमा यसको संक्रमण थप फैलिएको बताइएको छ । त्यसैले अमेरिकी अधिकारीहरुले सबैलाई थप सतर्कता अपनाउन सूचना जारी गरिरहेका छन् ।