​​​​​​​काठमाडौँ- नवनियुक्त शहरी विकास मन्त्री मेटमणि चौधरीले पदमा बसुन्जेल देश र जनताको हित हुने गरी इमानदारितापूर्वक काम गर्ने प्रतिबद्धता जनाएका छन्।

मंगलबार रिपोर्टर्स क्लब नेपालले आयोजना गरेको बधाई तथा सफल कार्यकालको शुभकामना कार्यक्रममा बोल्दै नवनियुक्त मन्त्री चौधरीले देश विकासको लागि सबैले आ–आफ्नो ठाउँबाट योगदान गर्न पनि आग्रह गरे ।

मुलुकमा ठूलाठूला क्रान्ति र परिवर्तन भएको स्मरण गराउँदै उनले देश विकासको लागि अब सबैले इमानदारितापूर्वक योगदान दिनुपर्ने बताए । उनले नेपालमा गलत काम गर्दा पनि सपोर्ट गर्ने अनि राम्रो काम गरेको छ भने विरोध गर्ने परम्परा रहेको भन्दै सहीलाई सही र गलतलाई गलत भन्ने बानीको विकास गर्नुपर्नेमा जोड दिए।

कार्यक्रममा माओवादी केन्द्रका नेता दिनानाथ शर्माले आफ्नो पार्टीले तत्काल मन्त्रीहरू फिर्ता बोलाउनेबारे कुनै छलफल र सोच नबनाएको स्पष्ट पारे। मन्त्रीहरूलाई राम्रोसँग काम गर्नको लागि समय दिनुपर्ने भन्दै छिटोछिटो मन्त्रीहरू हेरफेर गरेको विषयमा जनता पनि त्यति खुशी नभएको उनको भनाई छ ।

नेता शर्माले पालो पुर्‍याएर तीन÷तीन महिना र छ महिना सरकारमा सहभागी हुने पद्धतिलाई प्रोत्साहन गर्न नहुने धारणा राखे। त्यस्तै उनले संघ र प्रदेशको निर्वाचनमा गठबन्धनबिच सिटको बाँडफाँडमा पनि समस्या नहुने जिकिर गरे ।