काठमाडौँ- मलयालम फिल्मका अभिनेता तथा निर्माता विजय बाबु यौन दुर्व्यवहारको आरोपमा सोमबार पक्राउ परेका छन् ।

केरला उच्च अदालतको आदेशपछि विजयबाबु एर्नाकुलम टाउन साउथ पुलिस स्टेशनमा सोधपुछका लागि हाजिर भएको र त्यहीँ प्रहरीले हिरासतमा लिएको भारतीय सञ्चार माध्यममा खबर छ । २७ जुनमा हिरासतमा रहेका विजय बाबु ५ लाख धरौटीमा सर्तहरू सहित रिहा भएका छन् । केरला उच्च अदालतले उनलाई अग्रिम जमानत दिइसकेकाले उनलाई प्रहरीले रिहा गरेको हो ।

विजय बाबु रिहा हुनुअघि प्रहरीले घटना भएको कथित स्थानबाट प्रमाण सङ्कलन गर्ने बताइएको थियो । अदालतले विजय बाबुलाई अनुसन्धानमा सहयोग गर्न आदेश दिएपछि उनी प्रहरी समक्ष हाजिर भएका थिए । उनले यस विषयमा सामाजिक सञ्जाल वा अन्य कुनै समाचार माध्यमबाट चर्चा नगर्ने बताएका छन् ।

केही समय अगाडी सुरु भएको मीटू अभियान पश्चात् अहिले आफूले भोगेको यौन दुर्व्यवहारको विषयमा अभिनेत्रीहरू पनि खुलेर बोल्न थालेका छन् ।