काठमाडौं– संरचनागत कमजोरीका कारण अफगानिस्तानको सुरक्षा फौजले तालिबानको आक्रमण सामना गर्न असफल भएको प्रतिवेदन सार्वजनिक भएको छ ।

नेदरल्याण्ड्समा आधारित युरोपियन फाउण्डेसन फर साउथ एसियन स्टडिज नामक संस्थाले यस्तो नतिजासहित प्रतिवेदन सार्वजनिक गरेको भारतीय समाचार संस्था एएनआईले जनाएको छ ।

प्रतिवेदनमा ‘भुताहा (सरकारी प्रणालीमा दर्ता भएका तर वास्तविकतामा भने अस्तित्वमा नरहेका) सैनिक’ जस्ता कारणले अफगानिस्तानको राष्ट्रिय रक्षा बल असफल भएको जनाइएको छ ।

यसबाहेक तत्कालीन अफगान सरकारका प्रायः सबै क्षेत्रमा व्याप्त भ्रष्टाचारले गर्दा पनि अफगान फौजले तालिबानको सामना गर्न नसकेको प्रतिवेदनमा जनाइएको छ ।

यसबाहेक प्रतिवेदनमा सैनिकलाई अपर्याप्त तालिम दिइएकाले पनि अफगान फौज असफल हुन पुगेको जनाइएको छ ।

गत वर्षको अगष्ट महिनामा तालिबानले अमेरिका समर्थित तत्कालीन अफगान सरकारलाई अपदस्थ गरी सत्ता हत्याएको थियो ।