काठमाडौं– उत्तर एटलान्टिक सन्धि संगठन नेटोका महासचिव येन्स स्टोल्टेनबर्गले स्विडेन र फिनल्याण्डले सदस्यताका लागि आवेदन दिए स्वागत गर्ने टिप्पणी गरेका छन् ।

स्टोल्टेनबर्गलाई उद्धृत गर्दै अन्तर्राष्ट्रिय समाचार संस्था एपीले जनाएअनुसार सदस्यताका लागि आवेदन दिएको खण्डमा नेटोले फिनल्याण्ड र स्विडेनलाई खुला हृदयले स्वागत गरिनेछ ।

‘यो उनीहरुको निर्णय हो । तर यदि उनीहरुले आवेदन दिने निर्णय गरेको खण्डमा फिनल्याण्ड र स्विडेनलाई नेटोमा न्यानो स्वागत गरिनेछ र मेरो आशा छ, यो प्रक्रिया चाँडै सकिनेछ ।’ स्टोल्टेनबर्गलाई उद्धृत गर्दै एपीले जनाएको छ ।

यद्यपि उनले ती मुलुकहरु नेटोमा पूर्ण रुपमा आबद्ध हुन कति समय लाग्छ भन्नेबारे कुनै विवरण नदिएको जनाइएको छ ।

रुसले युक्रेनमाथि आक्रमण जारी राखेका बेला फिनल्याण्ड र स्विडेनले नेटोमा सदस्यताका लागि आवेदन दिन लागेको भन्ने समाचार सार्वजनिक भइरहेका बेला स्टोल्टेनबर्गको यस्तो टिप्पणी आएको हो ।

केही दिनअघि स्विडेन र फिनल्याण्डका अखबारहरुले अर्को महिना दुई मुलुकले सदस्यताका लागि आवेदन दिनेबारे सार्वजनिक घोषणा गर्ने खुलासा गरेका थिए ।