काठमाडौँ– निर्वाचन आयोगले स्थानीय निर्वाचनको आवश्यक तयारीका लागि सरकारलाई २४ बुँदे निर्देशन दिएको छ ।

सोमबार आयोगले पत्रकार सम्मेलन गरी चुनावका लागि आवश्यक कर्मचारीको व्यवस्थाका साथै सुरक्षालगायतका २४ बुँदे निर्देशन दिएको जानकारी दिएको हो ।

चैत १५ गतेअघि नै संघ, प्रदेश र स्थानीय तहमा कामका लागि खटिएका कर्मचारीलाई आफू पदाधिकार रहेकै कार्यालयमा फिर्ता गर्न सरकारलाई निर्देशन दिएको आयोगका प्रवक्ता शालिग्राम शर्मा पौडेलले जानकारी दिए ।

त्यस्तै चैत १५ अगावै कर्मचारीको सरुवा, पदस्थापन भएका कर्मचारीलाई निर्वाचन सम्पन्न नभएसम्म अन्यत्र काजमा खटाउन वा सरुवा नगर्नसमेत आयोगले सरकारलाई निर्देशन दिएको छ ।

स्थानीय तहमा रिक्त प्रमुख प्रशासकीय अधिकृतको सरुवा र पदस्थापन पनि चैत १५ अघि नै गर्न निर्देशन दिएको पौडेलले जानकारी दिए ।

त्यस्तै आयोगले मत्रपत्र छाप्न आवश्यक ७ सय मेट्रिक टन कागज खरिदका लागि सम्झौता गरेकोसमेत प्रवक्ता पौडेलले जानकारी दिए ।

स्थानीय निर्वाचन प्रयोजनका लागि हालसम्म ८० वटा दलले दर्ता गराएको आयोगले जनाएको छ ।