काठमाडौँ – मानव अधिकार तथा शान्ति समाजले युक्रेनमाथि रुसले गरेको आक्रमणको विरोध गरेको छ।

शान्ति समाजको काठमाडौँ शाखाले सोमबार (बिहान) बिहान बौद्धनाथ अगाडि गरेको प्रदर्शनमा उनीहरूले रुसले युक्रेनमाथि गरेको आक्रमणको विरोधमा हातमा कालो पट्टी बाँधेका थिए ।

रुसलाई तत्काल युद्ध रोक्न आग्रह एवं युक्रेनी जनता तथा युक्रेनमा रहेका सबै मानिसको जीवन रक्षाको आह्वानसहित हातमा मैनवत्ती बोकेर उनीहरूले आधा घण्टासम्म प्रदर्शनमा गरेका हुन्।

प्रदर्शनमा शान्ति समाजका संस्थापक सभापति कृष्ण पहाडीलगायत ६० जनाको सहभागिता थियो ।

यसअघि रुसलाई युद्ध रोक्न माग गर्दै शान्ति समाज मोरङ शाखाद्वारा फागुन १३ गते विराटनगरमा र दाङ शाखाद्वारा फागुन १५ गते तुलसीपुरमा प्रदर्शन गरिएको थियो । गत दुई सातामा ‘युद्ध निषेध, शान्ति विशेष’ अभियान अन्तर्गत शान्ति समाजले नेपालमा १० वटा प्रदर्शन गरिसकेको छ ।