काठमाडौँ- निर्वासनमा रहेको तिब्बत सरकारले १४ औँ दलाई लामाको पुनर्जन्मबारे चीनले भ्रम फैलाइरहेको आरोप लगाएको छ ।

केन्द्रीय तिब्बती प्रशासन (सीटीए) ले विज्ञप्ति जारी गर्दै दलाई लामाको पुनर्जन्मबारे चीनले भ्रम फैलाइरहेको आरोप लगाएको हो ।

सीटीएले सार्वजनिक गरेको विज्ञप्तिमा सन् २००७ यता तिब्बती बौद्ध धर्ममा पुनर्जन्मबारे नयाँ नीति अघि सारेर चीनले दलाई लामाको पुनर्जन्मलाई आफ्नो राजनीतिक स्वार्थसँग जोडेको आरोप लगाएको छ ।

यस्तै, सीटीएले चिनियाँ कम्युनिष्ट पार्टीका अधिकारीहरुले तिब्बती बौद्ध धर्ममा पुनर्जन्म प्रक्रियाबारे भ्रामक प्रचार गरेको समेत आरोप लगाएको छ ।

दलाई लामाले आफू ११३ वर्षसम्म बाँचिरहने बताएको अवस्थामा तिब्बती परम्पराअनुसार पुनर्जन्ममा विश्वास नराख्ने कुनै पनि पक्षले यसबारे हस्तक्षेप गर्न नहुने सीटीएले जनाएको छ ।

‘लामा/टुल्कुहरुको पुनर्जन्म तिब्बती बौद्ध परम्पराको मौलिक पद्धती हो ।’ विज्ञप्तिमा भनिएको छ, ‘यसका लागि विगत र भविष्यको जीवनप्रति विश्वास रहेको हुनु जरुरी छ ।’

यसबाहेक सीटीएले आफ्नो पुनर्जन्म र उत्तराधिकारीबारे दलाई लामाको व्यक्तिगत निर्णय नै सर्वोपरी हुने समेत जनाएको छ ।