आज २०७९ साल असोज ११ गते मंगलबार । सन् २०२२ को सेप्टेम्बर २७ तारिख । आजको दिन इतिहासमा भएका विभिन्न घटनाक्रम मध्ये केही घटनाक्रम यस्ता छन् ।

सन् २००७ सेप्टेम्बर २७ मा नासाले एस्टेरोइड बेल्टका दुई ठुला वस्तुहरु भेस्टा र सेरेसको अध्ययनको लाग ‘डन’ अन्तरिक्ष यान प्रक्षेपण गरेको थियो ।

सन् २००३ सेप्टेम्बर २७ मा यूरोपेली अन्तरिक्ष एजेन्सीले चन्द्रमाको कक्षमा ‘स्मार्ट–१’ उपग्रह प्रक्षेपण गरेको थियो ।

सन् १९९६ सेप्टेम्बर २७ मा तालिबानले काबुल अतिक्रमण गरेको थियो । सो अतिक्रमण पश्चात् इस्लामिक कट्टरपन्थी समूहले अफगानिस्तानको इस्लामिक इमिरेट्सको स्थापना गरेको थियो ।

सन् १९६२ सेप्टेम्बर २७ मा यमन अरब गणतन्त्रको स्थापना भएको थियो । राजा मोहम्मद अल–बद्रलाई सत्ताबाट हटाउन भएको कुपश्चात गमाल अब्देल नासिरले यमन अरब गणतन्त्रको स्थापनाको घोषणा गरेका थिए ।

सन् १९४० सेप्टेम्बर २७ मा दोस्रो विश्व युद्धअन्तर्गत जर्मनी, इटाली र इम्पेरियल जापानका प्रतिनिधिहरूले त्रिपक्षीय सम्झौतामा हस्ताक्षर गर्दै एक्सीस शक्तिको स्थापना गरेका थिए ।

सन् १९३७ सेप्टेम्बर २७ मा वयस्क बाली बाघलाई गोली हानी मारिएको थियो । अत्यधिक मानव गतिविधि र शिकारका कारण बालीको इन्डोनेसियाली द्विपको रैथाने बाली बाघ विलुप्त भएको थियो ।

सन् १९२२ सेप्टेम्बर २७ मा ग्रीसका कन्स्टेन्टाइन प्रथमले राजगद्दी त्यागेका थिए । सैनिय विद्रोहपश्चात् छोरा जर्ज दोस्रोको पक्षमा राजगद्दी त्यागेका थिए ।