काठमाडौँ- पाकिस्तानमा अर्को अमानवीय घटनाको खुलासा भएको छ ।

पाकिस्तानबाट प्रसारण हुने जियो न्युज टेलिभिजन च्यानलका अनुसार मुलुकको कराँची सहरमा ६ सन्तानका पिता एक जना श्रीमान्ले छोराछोरीकै अगाडी श्रीमतीको हत्या गरी पानीमा उमालेको घटना सार्वजनिक भएको हो ।

कराँचीको गुल्सन ए इकबालमा रहेको एक विद्यालयको भान्साघरमा महिलाको क्षतविक्षत शव फेला परेपछि घटनाको खुलासा भएको हो ।

घटनापछि पीडितकी १५ वर्षे छोरीले प्रहरीलाई जानकारी गराएकी थिइन् । हत्या गरिएकी महिलाको नाम नरगिस रहेको र घटनाबारे अनुसन्धान अघि बढाइएको प्रहरीले जनाएको छ ।

आशिक नाम गरेका उनका श्रीमान् सोही निजी विद्यालयमा चौकीदारको रुपमा कार्यरत रहेको र घटनापछि उनी फरार रहेको जनाइएको छ । फरार आशिकले आफ्ना तीन सन्तानलाई पनि लिएर गएको प्रहरीले जानकारी दिएको छ ।