काठमाडौँ– फिल्म ‘कृष्ण-लीला’ को सार्वजनिक पछिल्लो गीत ‘ए मेरो हजुर’ लाई दर्शकले रुचाएका छन् । विशेषतः गीतलाई टिकटकमा मन पराइएको छ। टिकटकमा ‘अटल वाचाँ गरेँ’ बोलको लाइन हिट भएपछि गीतको बोल नै यहीँ बनाइएको छ।  गीतको पहिलेको बोल ए मेरो हजुर हटाएर अहिले ‘अटल बाचा गरेँ’ राखिएको छ। 

रबि ओड र सुनीता कार्कीको स्वरमा रहेको ‘ए मेरो हजुर’ छोटो समयमै सम्भवतः सर्वाधिक टिकटक बन्ने पाश्र्व गीतका रुपमा कहलिएको छ । एक महिनाअघि सार्वजनीक भएको गीतको ‘अटल वाचा गरें’, ‘अघाउँदैनन् कहिल्यै आँखा मेरा’ र ‘मेरो ध्यान त्यतै तानीसक्यौ तिम्ले’ बोलमा सेलिब्रेटीदेखि लिएर सर्वसाधरणले समेत अधिक मात्रामा टिकटक बनाएका छन् । डा. डिआर उपाध्यायले लेखेको गीतमा पुष्प खड्का र श्रद्धा क्षेत्री फिचर छन् । बाबुल गिरीको संगीत, माइकल चन्दको कोरियोग्राफी, उत्सव दाहालको छायांकन र शिलन लम्सालले सम्पादन गरेको गीत ५२ सय मिटर माथिको तिलिचो ताल क्षेत्रमा खिचिएको हो ।

भदौ ३ गतेदेखि प्रदर्शनमा आउने फिल्म  ‘कृष्ण–लीला’ को  ‘त्यो कथामा एउटा राजा एउटी रानी भैदियोस्’  यस अगाडि नै सफल भइसकेको छ। दीपक ओलीको निर्देशनमा बनेको फिल्मको प्रस्तुतकर्ता रोहित कट्टेल र कार्यकारी निर्माता रत्न श्रेष्ठ हुन । फिल्ममा पुष्प र श्रद्धाका साथमा बुद्धि तामाङ, रबिन्द्र झा, भावना गुरुङ, नवीन रेग्मी, हिउँवाला गौतम, आयुषा क्षेत्री तथा बालकलाकार आयुष मुख्य भूमिकामा छन् । रंगपत्रकार लक्ष्मण सुवेदीद्वारा लिखित फिल्म पाँचथर, इलाम, झापाका रमणीय स्थलमा छायांकन गरिएको हो । 

शिव ढकालले खिचेको फिल्मको सम्पादन अर्जुन जिसीले गरेका छन् । अर्जुन पोखरेल र बाबुल गिरीको संगीत, रामजी लामिछाने र माइकल चन्दको कोरियोग्राफी तथा श्री श्रेष्ठको द्धन्द्ध निर्देशन रहेको फिल्मको बितरण पनि निर्माण ब्यानर आरआर फिल्मस्ले गर्दैछ ।