बैतडी- जिल्ला प्रशासन कार्यालय बैतडीले जिल्लामै पहिलोपटक विद्युतीय राहदानी ई–पासपोर्ट सेवा सुरु गरेको छ ।

एमआरपी राहदानी विस्थापित गरेर विद्युतीय राहदानी सुरु गरिएको जिल्ला प्रशासन कार्यालयका सूचना अधिकारी खगेन्द्र भारतीले जानकारी दिए । ई-पासपोर्ट सेवा जिल्लामै सुरु भएपछि धेरै समय पर्खिनुपर्ने र राहदानी बनाउन काठमाडौं पुग्नुपर्ने बाध्यता हटेको हो ।

अब वैदेशिक रोजगारीमा जानेले जिल्ला प्रशासन कार्यालयमा तीन हप्ताभित्र राहदानी पाउने र विद्युतीय राहदानी ई-पासपोर्ट बनाउनेले रु पाँच हजार शुल्क तिर्नुेपर्ने छ । यस्तै विद्युतीय राहदानी ई-पासपोर्टका लागि घरबाटै पनि फर्म भर्न सकिने जनाइएको छ ।

राहदानी बनाउन तीन महिना लाग्ने गरेकामा अब भने तीन हप्तामै जिल्लामा राहदानी आइपुग्ने भएको हो । काठमाडौँ पुगेर राहदानी बनाउनुपर्दा जिल्लावासीलाई निकै अप्ठ्यारो र खर्चिलो हुने गरेकामा अब राहत मिलेको जिल्ला प्रशासन कार्यालयले जनाएको छ । यहाँ गत मङ्सिर २ गतेदेखि एमआरपी राहदानी बनाउन बन्द गरिएको थियो ।