काठमाडौं– सिरियाको मानवीय अवस्था निकै नै गम्भीर रहेको संयुक्त राष्ट्रसंघले जनाएको छ ।

मानवीय सहायतासम्बन्धी संयुक्त राष्ट्रसंघीय निकायका उपप्रमुख जोसे मुस्याले सिरियामा मानवीय अवस्था दिनप्रतिदिन गम्भीर र निकै कमजोर बन्दै गएको बताएका हुन् । उनले यसका लागि विश्व समुदायको ध्यानाकर्षण पनि गराएका छन् ।

सिरियामा पछिल्ला वर्षहरूमा आर्थिक अवस्था कमजोर हुँदै गएको र यही आर्थिक संकटकै समयमा राजनीतिक तथा अन्य अवस्था पनि नाजुक भएको उनको भनाइ छ । सन् २०११ बाट सुरु भएको सरकार विरोधी आन्दोलनपछि सिरियामा गृहयुद्धमा फसेको छ ।

त्यसयता सिरियामा आर्थिक संकट निम्तिएको भन्दै सिरियाका अधिकारीहरूले अहिले देशको अवस्था नाजुक भएको बताइरहेका छन् ।

संयुक्त राष्ट्रसंघले अहिले पनि दशौँ लाख सिरियालीहरुले खानाकै लागि संघर्ष गर्नु परिरहेको, खाद्यान्न औषधिजस्तो आधारभूत आवश्यकताहरूको पनि चरम अभाव रहेको तथा राजनीतिक संकट झन् गहिरिँदै जादा यहाँका नागरिक देश छोडेर भाग्नु परेको अवस्था रहेको बताएको छ ।