काठमाडौं– अफगानिस्तानका दुई तिहाइ बालबालिकाले पर्याप्त खाना नपाउने तथ्यांक सार्वजनिक भएको छ ।

बेलायतमा आधारित बालअधिकारवादी संस्था सेभ द चिल्ड्रेनले अफगानिस्तानमा १ करोड २० लाख अर्थात् कूल बालबालिकामध्ये दुई तिहाइले पर्याप्त खाना नपाउने गरेको तथ्यांक सार्वजनिक गरेको हो ।

तीमध्ये ५० लाख बालबालिका भोकमरीको जोखिममा रहेको पनि उक्त संस्थाले जनाएको छ ।

‘मानवीय सहयोगले केही अत्यावश्यक वस्तुको आपूर्ति त होला तर यसले पूरै अर्थतन्त्रलाई जोगाउन सक्दैन ।’ सेभ द चिल्ड्रेनका अफगानिस्तान निर्देशक क्रिस न्यामन्डीले भने, ‘जबसम्म हामीले आर्थिक संकटको सम्बोधन गर्दैनौँ, तबसम्म बच्चालाई बेचिदिने, बालश्रम गराउने जस्ता घटना बढिरहन्छन् ।’

यता केही बालअधिकार अभियन्ताहरुले भने अफगानिस्तानमा अन्तर्राष्ट्रिय निकायहरुले बाल सुरक्षाका लागि पर्याप्त ध्यान दिनुपर्ने बताएका छन् ।

अफगानिस्तानको समाचार च्यानल टोलोसँग कुराकानी गर्दै महिला तथा बालअधिकार अभियन्ता जरका यफ्तालीले भनिन्– ‘आर्थिक अवस्थामा सुधार नहुने हो भने यस्ता संकटले अफगानिस्तानका बालबालिकामा अल्पकालीन र दीर्घकालीन रुपमा नकारात्मक असर पर्नेछ ।’