काठमाडौँ – प्रतिनिधिसभा अन्तरगत प्रत्यक्षतर्फ मतपरिणाम सार्वजनिक भइरहँदा महन्थ ठाकुर नेतृत्वको लोकतान्त्रिक समाजवादी पार्टी (लोसपा) आठौं स्थानमा देखिएको छ । बर्तमान सत्ता गठबन्धनसँग चुनावी तालमेल गरि निर्वाचनमा होमिएको लोसपाले अहिलेसम्म मात्रै चार ठाउँमा जित निकालेको छ ।

लोसपाको तर्फबाट रुपन्देही ४ मा सर्वेन्द्रनाथ शुक्ला विजयी भएका छन् । उनले नेपाली कांग्रेसका उम्मेदवारलाई पराजित गरेका हुन् । शुक्ला २८ हजार मत प्राप्त गर्दा नेपाली कांग्रेसका उम्मेदवार प्रमोद कुमार यादवले २२ हजार ७४० मत प्राप्त गरेका थिए ।

यस्तै लोसपाबाट विजयी हुने अर्का नेता हुन्, पार्टी अध्यक्ष महन्थ ठाकुर । उनी महोत्तरीको निर्वाचन क्षेत्र नम्बर ३ मा जसपाका उम्मेदवार हरिनारायण यादवलाई पराजित गर्दै विजयी भएका हुन् ।

यता महोत्तरीको क्षेत्र नम्बर २ मा पनि लोसपाकै शरत सिंह भण्डारी विजयी भएका छन् । उनी २५ हजार १९० मतसहित विजयी भएका हुन् । भने सर्लाहीको क्षेत्र नम्बर १ मा पनि लोसपाले जित हात पारेको छ । त्यहाँ लोसपाका नेता राम प्रकाश चौधरी २४ हजार ८३८ मतसहित विजयी भएका छन् ।