काठमाडौँ – आज २०७९ साल भदौ १० गते शुक्रबार । सन् २०२२ को अगस्ट २६ तारिख । आजको दिन इतिहासमा भएका केही महत्वपूर्ण घटनाक्रम यस्ता छन् :

सन् १९९९ अगस्ट २६ मा इस्लामिक अन्तर्राष्ट्रिय शान्ति स्थापना ब्रिगेडले दागिस्तान अतिक्रमण गरेको प्रतिक्रयास्वरुप रुसले दोस्रो चेचेन युद्धको सुरुवात गरेको थियो ।

सन् १९७८ अगस्ट २६ मा सिग्मन्ड जियेन अन्तरिक्षमा जाने पहिलो जर्मन बने । जर्मन वायु सेनाको पूर्व पाइलट रहेका जियेनले सल्यूट ६ स्पेस स्टेसन जाने सोभियत अन्तरिक्ष यान ‘सोयूज ३१’ को टोलीको सदस्य बनेका थिए ।

सन् १९६६ अगस्ट २६ मा नामिबियाली स्वतन्त्रता युद्धको सुरुवात भएको थियो । उत्तर अफ्रिकी सरकारविरुद्ध चलेको सो युद्ध २४ वर्षसम्म चलेको थियो । उत्तर अफ्रिकी रक्षा सेनाले उत्तर–पश्चिम अफ्रिका जनताको संगठन स्वापोमाथि आक्रमणपश्चात सो युद्धको थालनी भएको थियो ।

सन् १९५७ अगस्ट २६ मा फोर्ड मोटर कम्पनीले पछिल्लो विलासिता गाडी ‘एडसेल’ सार्वजनिक गरेको थियो ।

सन् १९५५ अगस्ट २६ मा टेनिस प्रतियोगिताको पहिलो कलर प्रसारण भएको थियो । न्यूयोर्कको फरेस्ट हिल्सस्थित वेस्ट साइड टेनिस क्लबमा ‘द डेभिस कप’ अन्तर्गत भएको अष्ट्रेलिया र संयुक्त राज्य अमेरिकाबीच भएको सो खेल एनबीसीले प्रसारण गरेको थियो ।

सन् १९२० अगस्ट २६ मा संयुक्त राज्य अमेरिकी संविधानको १९औँ संशोधन लागू भएको थियो । सो संशोधन लागू भएसँगै महिलाहरूले औपचारिक रुपले मतदान गर्ने अधिकार प्राप्त गरेका थिए ।

सन् १९१४ अगस्ट २६ मा पहिलो विश्व युद्धअन्तर्गत जर्मन र रुसी सेनाबीच ट्यानेनबर्गको युद्ध सुरु भएको थियो ।

सन् १९१० अगस्ट २६ मा नोबल पुरस्कारले विभूषित मदर टेरेसाको म्यासेडोनियामा जन्म भएको थियो । मदर टेरेसा भारतको कलकत्तामा गरिब विद्यार्थीहरुलाई पढाउन सुरु गरेका अभियान, मानवीय कार्य र क्रिश्चियन मिसनरीका रुपमा पनि चिनिन्छन् ।

सन् १८८३ अगस्ट २६ मा इन्डोनेसियामा क्राताताओ ज्वालामुखी विस्फोट हुन सुरु भएको थियो । सो ज्वालामुखी विस्फोट हुँदा ३६ हजार मानिसको मृत्यु हुनुको साथै सुनामी पनि आएको थियो ।

सन् १७६८ अगस्ट २६ मा अन्वेषक जेम्स कुकले ‘एचएमएस इन्डेभर’ नामक जहाजमा यात्रा सुरु गरे । सन् १७७१ जुलाई १२ मा सो जहाज बेलायतमा फर्केको थियो ।