काठमाडौँ : व्यवसायी पवन गोल्यानले विदेशमा रहेका धेरै नेपालीले बैंक खाता खोल्न नपाएको भन्दै गम्भीर प्रश्न खडा गरेका छन् । विदेशमा रहेका नेपालीले रेमिट्यान्सबाट नेपालमा पैँसा पठाइरहेपनि उनीहरुले खाता खोल्न नपाएको उनले बताए । विदेशमा रहेका नेपालीले बैंकिङ खाता खोल्न नपाउँदा ठूलो पैँसाको स्रोत सरकारको तथ्यांकबाट बाहिर गएको उनको भनाई छ ।

खबरहबले आयोजना गरेको मौद्रिक नीतिसम्बन्धी कार्यक्रममा उनले यस्तो बताएका हुन् । नेपालमा रहेका विदेशीले सजिलै बैंक खाता खोल्न पाउने भएपनि विदेशमा रहेका नेपालीले सजिलै खाता खोल्न नसकेको उनको भनाई छ । यसतर्फ राष्ट्र बैंकले ध्यान दिनुपर्ने उनले बताए ।

‘विदेशमा रहेका नेपाली कहिलेसम्म खाता खोल्नबाट बञ्चित भइरहनुपर्ने हो’, उनले कार्यक्रममा भने, ‘नेपालीले खाता खोलेर त्यो पैँसा नेपाल पठाउँदा वार्षिक ५ खर्ब पैँसा आउँछ । तर खाता खोल्न नपाउँदा त्यो पैंसा तथ्यांकमै देखिन पाएको छैन । यसतर्फ राष्ट्र बैंकको ध्यान जाओस् ।’

बैंक सञ्चालकलाई राष्ट्र बैंकले गोठालो बनाएको पनि उनले टिप्पणी गरे । व्यवसायी र राष्ट्र बैंकको कोपभाजनमा बैंक सञ्चालक रहेको पनि उनले बताए ।

साथै उनले सबै सरोकारवालाले खाद्य सुरक्षा नगरेको खण्डमा देशमा अर्को संकट आउन सक्ने पनि उनले चेतावनी दिए । किसान र अन्नदातालाई सुरक्षा दिन नसकेको खण्डमा देशमा ठूलो क्षति हुन सक्ने पनि उनले चिन्ता व्यक्त गरे ।

शेयर बजार लगायत सबै क्षेत्रका साना व्यापारीलाई जोगाउन नसके देश दुर्घटनामा फस्ने पनि उनले बताए । आफूले ठूलो लगानीकर्तालाई रोकेर साना लगानीकर्तालाई ऋण उपलब्ध गराएको पनि उनले बताए ।

‘हामी सबैले गम्भीर भएर सोचौँ, किसान र अन्नदातालाई सुरक्षा दिन नसक्ने हो, उनीहरुलाई उद्धार गर्ने र बचाउने नीति ल्याउन नसक्ने हो वा साना लगानीकर्ता बचाउन नसक्ने हो भने देश दुर्घटनामा जान्छ,’ उनले भनेका छन् ।