कठमाडौँ : शेयर बजारकी व्यापारी राधा पोखरेलले मौद्रिक नीतिले शेयर बजारलाई खासै ठूलो राहत नदिएको बताएकी छन् । मौद्रिक नीतिका बारेमा खबरहबले आयोजना गरेको छलफलमा उनले यस्तो बताएकी हुन् । पछिल्लो समय शेयर बजारका व्यापारी आत्महत्या गर्नुपर्ने अवस्थामा पुगेपनि त्यसको सुधारका लागि राष्ट्र बैंकको नीति राम्रो नआएको उनले बताएकी हुन् ।

यस्तो अवस्थामा राष्ट्र बैंकले ल्याएको मौद्रिक नीति शेयर बजारका लागि सिटामोल मात्रै भएको उनले बताइन् । सरकारकै कारण शेयर बजार अहिले कोमामा रहेको पनि उनले भनाई छ ।

‘कोमामा रहेको शेयर बजारलाई उकास्न राम्रो औषधि चाहिन्थ्यो, तर मौद्रिक नीति सिटामोल मात्रै हो’ उनले भनिन् । राष्ट्र बैंकले फुलबुट्टा भरेर मौद्रिक नीति ल्याएपनि त्यो शेयर बजारका लागि राहत दिने खालको नभएको पोखरेलले बताइन् ।

साथै उनले राष्ट्र बैंकका अधिकारीले शेयर बजारलाई धितोपत्र बोर्डले नियमन गर्ने भनेपनि मौद्रिक नीतिका कारण शेयर बजार प्रभावित भएको बताइन् । ‘राष्ट्र बैंकको हरेक नीतिले शेयर बजारलाई प्रभावित गर्छ,’ उनले भनिन्, ‘तर केन्द्रीय बैंकका अधिकारी हामीलाई धितोपत्र बोर्ड जानुस् भन्नुहुन्छ । यो ठूलो समस्या हो । ठूलो गैरजिम्मेवारीपन हो ।’