काठमाडौँ– दक्षिण अफ्रिकाको एउटा नाइट क्लबमा १७ जनाको शव फेला परेको छ । दक्षिण अफ्रिकाको इस्ट लण्डन सहरमा रहेको नाइटक्लबमा १७ जनाको शव फेला परेको हो ।

बीबीसीका अनुसार एन्योबेनी टाभेर्नमा आइतबार एकाबिहानै १७ जनाको शव फेला परेको हो । त्यहाँ अरु केही मानिसहरु घाइते भएको देखिएको जनाइएको छ ।

‘घटनाको अवस्थाबारे अनुसन्धान अघि बढाइएको प्रहरी प्रवक्ता ब्रिगेडियर टेम्बिन्कोसी किनानाले दक्षिण अफ्रिकाको न्युजरुम अफ्रिका टेलिभिजन च्यानललाई जानकारी दिए । घटनाबारे अहिले नै निष्कर्षमा पुग्न नहुने उनले बताएको बीबीसीले जनाएको छ ।

पीडितका आफन्तहरुले आफूहरुलाई सुरक्षा अधिकारीहरुले मृतकको शव हेर्न समेत नदिएको आरोप लगाएका छन् ।

दक्षिण अफ्रिकाको इस्टर्न केप प्रहरी आयुक्त नोम्थेथेलेली लिलियानले दक्षिण अफ्रिकाको प्रसारण संस्था एसएबीसीलाई बताएअनुसार नाइटक्लबभित्र ‘संदिग्ध भागदौड’ मच्चिँदा घटना भएको देखिएको छ ।

घटनामा मारिएका अधिकांशको उमेर १८ देखि २० वर्ष रहेको छ ।