काठमाडौं– स्विडेन र फिनल्याण्डले अर्को महिना नेटोमा सदस्यताका लागि आवेदन दिने भएका छन् । ती मुलुकका स्थानीय अखबारहरुले आगामी मे महिनामा नेटोमा सदस्यताका लागि आवेदन दिने खुलासा गरेको अन्तर्राष्ट्रिय समाचार संस्था रोयटर्सले जनाएको छ ।

फिनल्याण्डको ‘इल्थालेह्टी’ र स्विडेनको ‘एक्सप्रेसेन’ अखबारले श्रोतलाई उद्धृत गर्दै दुबै मुलुकले अर्को महिना नेटो सदस्यताका लागि आवेदन दिने जनाएका हुन् ।

‘इल्थालेह्टी’ का अनुसार मे महिनाको मध्यमा दुबै मुलुकका नेताहरूले भेट गरी सार्वजनिक रुपमा नेटो सदस्यताका लागि आवेदन दिएको घोषणा गर्नेछन् ।

यसबारे फिनल्याण्डका विदेशमन्त्री पेक्का हाभिस्टोले यसबारे टिप्पणी गर्न अस्वीकार गरेको रोयटर्सले जनाएको छ ।

यस्तै, स्विडेनको ‘एफ्टोनब्लाडेट’ अखबारले स्विडेन सरकार निकट श्रोतलाई उद्धृत गर्दै बेलायत र अमेरिकाले मुलुकमा सैनिक उपस्थितिलाई बढाउने बाचा गरेको जनाएको छ ।

‘एक्सप्रेसेन’ र ‘एफ्टोनब्लाडेट’ को समाचारबारे स्विडेनको विदेश मन्त्रालयले पनि टिप्पणी गर्न अस्वीकार गरेको जनाइएको छ ।

दुई साताअघि स्विडेनी समकक्षी माग्दालेना एण्डरसनसँगको भेटमा फिनल्याण्डकी प्रधानमन्त्री सान्ना मारिनले केही साताको अवधिमा फिनल्याण्डले नेटोमा सदस्यता दिने नदिनेबारे निर्णय गर्ने अपेक्षा गरेको बताएकी थिइन् ।

नेटोका साझेदारहरुसँग सैनिक सहयोग र सहकार्यलाई बढाएपनि यी दुई मुलुकले यसअघि नेटोमा आबद्ध हुन आनाकानी गरिरहेका थिए ।

यद्यपि गत फेब्रुअरी २४ मा रुसले युक्रेनमाथि आक्रमण गरेपछि भने दुबै मुलुकले नेटोको सदस्यताका लागि आवेदन दिन लागेका हुन् ।