काठमाडौं– युक्रेनमाथि आक्रमण थालेलगत्तै रुसले युरोपेली भू उपग्रह सञ्जाललाई निशाना बनाएर साइबर हमला गरेको खुलासा भएको छ । अमेरिकी साइबर सुरक्षा अधिकारीले वाशिंटन पोष्टलाई बताएअनुसार रुसी आक्रमणकै दिन फेब्रुअरी २४ मा रुसी साइबर सेनाले इन्टरनेट प्रदायक युरोपेली भू उपग्रह सञ्जाल केए–स्याट माथि साइबर हमला गरेका थिए ।

अमेरिकी भू उपग्रह सञ्चार कम्पनी भायस्याटको स्वामित्वमा रहेको ‘केए स्याट’ माथिको साइबर हमलाका कारण युक्रेनी सैनिक सञ्चार नै अवरुद्ध हुन पुगेको थियो ।

यसको केही दिनपछि भायस्याटले ‘साइबर घटना’ का कारण यस्तो भएको बताएपनि यसबारे विस्तृत विवरण भने दिएको थिएन ।

यसबाट पर्न गएको असरबारे युक्रेनी सेनाका तर्फबाट पनि केही विवरण आएको छैन । यसबारे अमेरिकी सुरक्षा अधिकारीले युक्रेनी गुप्तचर निकायसँग मिलेर अनुसन्धान गरिरहेको भएपनि कुनै निष्कर्ष निकालेको छैन ।

यद्यपि गोप्य श्रोतलाई उद्धृत गर्दै पोष्टले जनाएअनुसार उक्त अनुसन्धानले घटनामा रुसी साइबर सेनाकै हात रहेको देखाएको छ ।