काठमाडौँ– बंगलादेशका लागि नवनियुक्त नेपाली राजदूत घनश्याम भण्डारीले नेपालले बंगलादेशलाई ४० देखि ५० मेगावाट विद्युत आपूर्ति गर्न तयार रहेको जनाएका छन् ।

बंगलादेशी प्रधानमन्त्री शेख हसिनासँगको भेटवार्ताका क्रममा राजदूत भण्डारीले नेपालले बंगलादेशलाई ४० देखि ५० मेगावाट विद्युत आपूर्ति गर्न तयार रहेको जनाएका हुन् । नेपालमा जलविद्युत परियोजनाको निर्माण कार्य सम्पन्न भएसँगै उक्त परिमाण बढ्न सक्ने उनको भनाइ छ ।

राजदूत भण्डारीले बंगलादेशको बंगालबन्धु बन्दरगाह प्रयोगबारे पनि इच्छा प्रकट गरेको बंगलादेशी प्रधानमन्त्री कार्यालय गणभवनका प्रवक्ता एहसानुल करिमलाई उद्धृत गर्दै बंगलादेशबाट प्रकाशित हुने प्रोथोम आलोको अनलाइन संस्करणले जनाएको छ ।

राजदूत भण्डारीले नेपाल बंगलादेशसँग द्विपक्षीय सम्बन्ध अझ सुदृढ गर्न समेत तयार रहेको जनाएका छन् ।

जवाफमा बंगलादेशी प्रधानमन्त्री शेख हसिनाले नवनियुक्त राजदूत भण्डारीलाई बधाई दिँदै सन् १९७१ को बंगलादेशी स्वतन्त्रता सङ्ग्राममा नेपालले आफ्नो मुलुकलाई गरेको सहयोगको पनि स्मरण गरेको प्रोथोम आलोले जनाएको छ ।

प्रधानमन्त्री हसिनाले दुई मुलुकबीच व्यापारलाई अझ सुदृढ गर्नुपर्नेमा समेत जोड दिएकी छिन् ।