काठमाडौँ- चीनको स्वशासित क्षेत्र सिन्जियाङमा उइगुर मुसलमानविरुद्ध जारी ज्यादतीविरुद्ध संयुक्त राष्ट्रसंघको मुख्यालय अगाडि प्रदर्शनको आयोजना गरिएको छ ।

निर्वासनमा रहेको पूर्वी तुर्केस्तान सरकार, पूर्वी तुर्केस्तान राष्ट्रिय जागरण अभियान र स्वतन्त्र कजाख संस्थाको आयोजनामा राष्ट्रसंघको मुख्यालय अगाडि प्रदर्शनको आयोजना गरिएको हो ।

प्रदर्शनकारीले उइगुर अल्पसङ्ख्यकविरुद्ध चीनले जारी राखेको आम नरसंहारको विवरण सार्वजनिक गर्न राष्ट्रसंघसमक्ष माग गरेका थिए ।

चीनले उइगुर मुसलमानमाथी जारी राखेको दमनबारे विवरण सार्वजनिक नगर्न राष्ट्रसंघीय मानवअधिकार प्रमुख मिशेल बाचलेटमाथि दबाब दिएको समाचार सार्वजनिक भएसँगै राष्ट्रसंघको मुख्यालयअगाडि प्रदर्शनको आयोजना गरिएको भारतीय समाचार संस्था एएनआईले जनाएको छ ।

सिन्जियाङ क्षेत्रमा बसोबास गर्ने दशौँ लाख उइगुर, कजाख, किर्गिजजस्ता तुर्केली जातीका मानिसहरुलाई चीनले बन्दी शिविरमा राख्दै आएको बताइन्छ । यसबाहेक त्यहाँ बलात्कार, हिंसा, हत्या, जबरजस्ती बन्ध्याकरणजस्ता घटना पनि हुने गरेको अन्तर्राष्ट्रिय सञ्चारमाध्यमले जनाएका छन् ।