काठमाडौँ– कोरोना भाइरस (कोभिड – १९) अगावै ओटीटी प्लेटफर्मले विस्तारै दर्शकको साथ पाउन थालेका थिए । तर, उक्त समयमा हलमा रिलिज भएका र केही ओर्जिनल कन्टेन मात्र पाइन्थ्यो ।

किनकी दर्शकलाई ओटीटी प्लेटफर्मले खासै तानिसकेको थिएन । यद्यपि केही सिरिजले भने प्लेटफर्मलाई नै चर्चामा ल्याई रहेका थिए । सैफ अलि खान र नवाजुद्दीन सिद्द्की अभिनीत सेक्रेड गेम्सले नेटफ्लिक्स, अलि फजल र पंकज त्रिपाठी अभिनीत मिर्जापुरले अमेजन प्राइम, कुनाल खेमु अभिनित अभयले जी फाइभ, स्वप्निल जोशी अभिनीत समान्तरले एमएक्स प्लेयरलाई दर्शक माझ अगाडि ल्यायो ।

यस्तैमा पर्छ सिरिज असुर । यसले नामै नसुनेको ओटीटी प्लेटफर्म भुट सेलेक्टलाई दर्शक माँझ परिचित गरायो । विज्ञान र मिथको सम्मिश्रण गरी बनाइएको क्राइम थ्रिलर विधाको यो वेब सिरिज सन् २०२० मा रिलिज हुँदा सामाजिक सञ्जालमा तरङ ल्याउन सफल भएको थियो । सिरिजले दर्शकलाई उत्साहित मात्र बनाएन , दोस्रो भागको प्रतीक्षामा समेत राख्यो । तर, दोस्रो भाग छायांकन भइसकेको लामो समय भएता पनि अझै प्रदर्शनमा आउन सकेको छैन । 

यद्यपि सामाजिक सञ्जालमा असुरको दोस्रो सिजन आउँदो महिना जुलाई वा अगस्टमा स्ट्रिमिङ हुन् सक्ने चर्चा बढेको छ । यो चर्चा बढेसँगै फ्यान उत्साहित भएका छन् । केही भारतीय मिडियाले पनि फुटवलको वर्ल्डकप अगाडि नै सिरिज ओटीटीमा आउने जनाएका छन् । सिरिजमा अरसद वारसी मुख्य भूमिकामा छन् । अनुसन्धान अधिकृतको भूमिका निर्वाह गरेका अरसदलाई वरुण सोबतीले साथ दिएका थिए । सिरिजमा रिधी डोगरा, अनुप्रिया गोयन्का, शरिब हासमी आदि कलाकारले दोस्रो सिजन पनि निरन्तरता पाउनेछन् ।