काठमाडौं– अमेरिकी विदेशमन्त्री एन्टोनी ब्लिन्केन तथा रक्षामन्त्री लोयड अष्टिनले युक्रेनको भ्रमण गरेका छन् ।

रुसले गत फेब्रुअरी २४ मा आक्रमण गरेयता अमेरिकी प्रशासनका सबैभन्दा शीर्ष अधिकारीहरुले युक्रेनको भ्रमण गरेका हुन् । राजधानी किभमा उनीहरुले राष्ट्रपति भोलोदिमिर जेलेन्स्कीसँग भेटवार्ता गरेको जनाइएको छ ।

भेटवार्ताका क्रममा अमेरिकी अधिकारीहरुले रुसविरुद्ध लड्न युक्रेनलाई थप हतियार सहयोग गर्ने बाचा गरेको अमेरिकी सार्वजनिक रेडियो एनपीआरको अनलाइन संस्करणले जनाएको छ ।

उनीहरुले जेलेन्स्कीलाई अमेरिकाले १६ करोड ५० लाख डलर बराबरको गोलीगठ्ठा बिक्रीलाई सदर गरेको र ३० करोड डलर सहायता उपलब्ध गराउने बताएको जनाइएको छ ।

अमेरिकाले पछिल्लो समय युक्रेनलाई ठूलो स्तरमा सैनिक सहायताको घोषणा गर्दै आएको छ ।

केही दिनअघिमात्रै अमेरिकी राष्ट्रपति जो बाइडेनले युक्रेनलाई ८० करोड डलर बराबरको सैन्य सहायता उपलब्ध गराउने घोषणा गरेका थिए ।