काठमाडौँ– पुराना निर्देशक ज्ञानेन्द्र देउजा निर्देशनमा तयार भएको फिल्म ‘झिँगेदाउ’ आउँदो वर्ष २०७९ को भाद्र ३१ मा प्रदर्शन हुने भएको छ ।

निर्माण पक्षले फस्टलुकअन्तर्गत एक पोष्टर सार्वजनिक गर्दै डेट घोषणा गरेको हो ।

सार्वजनिक पोष्टरमा फिल्मका मुख्य पात्रहरू मुकुन भुषाल, केकी अधिकारी, आँचल शर्मालगायत फिचर्ड छन् । डेढ दशकअघि व्यावसायिक सफल फिल्म निर्देशकका रूपमा चिनिने ज्ञानेन्द्र यसै फिल्म मार्फत निर्देशनमा फर्किएका छन् ।

प्रदीप भारद्वाजको लेखन रहेको फिल्म महिला विषयवस्तु केन्द्रित छ । साहित्यकार भीमनिधि तिवारीको कालजयी कथामा आधारित ‘झिँगेदाउ’ कपन गढी सिनेमा प्रा.लिको ब्यानरमा निर्माण भएको हो । फिल्मको छायाँकन सिन्धुली, खोटाङ, दोलखा र काठमाडौँमा गरिएको छ ।

फिल्ममा विष्णु कल्पितको छायांकन, मित्र डी गुरुङको सम्पादन, अर्जुन पोखरेलको संगीत रहेको छ भने यसको पटकथा एवं संवाद प्रदीप भारद्धाजले तयार पारेका छन् । ‘मुना मदन’, ‘वुद्ध वर्न इन नेपाल’, ‘रक्षक’, ‘कुरुक्षेत्र’, ‘देवर बाबु’, ‘हामी ट्याक्सी ड्राइभर’ लगायतका फिल्मको निर्देशन गरिसकेका ज्ञानेन्द्रकै निर्माणमा फिल्म तयार भएको हो ।