काठमाडौं– अमेरिकाका पूर्वराष्ट्रपति डोनाल्ड ट्रम्पले हिलारी क्लिन्टन, डेमोक्र्याटिक पार्टीको राष्ट्रिय समिति र अरु २६ जनाविरुद्ध मुद्दा दायर गरेका छन् । सन् २०१६ मा आफ्नो चुनावी अभियानविरुद्ध षड्यन्त्र गरेको दाबी गर्दै ट्रम्पले मुद्दा दायर गरेका हुन् ।

रुसले आफूलाई सहयोग गरेको भन्दै अमेरिकाको ‘डिप स्टेट’ (प्रत्यक्ष नदेखिने तर देशभित्रको गोप्य भित्री संयन्त्रमा रहेको) ले झूठो आरोप लगाएर षड्यन्त्र रचिएको उनको दाबी छ । उनले मुद्दा दायर गरेका व्यक्तिहरुमा पूर्व अमेरिकी विदेशमन्त्री हिलारी क्लिन्टन र उनका साझेदारहरु, अमेरिकी संघीय जाँचबुझ ब्यूरो एफबीआईका पूर्व निर्देशक जेम्स कोमी, अवकाशप्राप्त बेलायती जासुस क्रिष्टोफर स्टिल र उनका सहयोगीहरु छन् ।

१०८ पृष्ठ लामो मुद्दामा उनले २ करोड ४० लाख डलर क्षतिपुर्ति मागिएको छ । मुद्दामा डेमोक्र्याटहरुले रुसले आफ्नो निर्वाचन अभियानमा सहयोग गरेको प्रमाण जुटाउन वकिलहरु नियुक्त गरेको र मिडियामा यसबारे झूठो प्रचार गरेको दाबी गरिएको छ ।

सन् २०१६ मा भएको राष्ट्रपतीय निर्वाचनमा रुससँग साँठगाँठ गरेको भन्दै उनी राष्ट्रपति भएकै बेला अनुसन्धान भएको थियो । अमेरिकी न्याय मन्त्रालयका विशेष अभियोजनकर्ता रोबर्ट मुलरले गरेको अनुसन्धानमा ट्रम्प–रुस साँठगाँठबारे यथेष्ट प्रमाण नजुटेपछि उनी जोगिएका थिए ।