तनहुँ– जिल्ला प्रशासन कार्यालय तनहुँले आजदेखि आलोपालो प्रणालीबाट सेवा प्रवाह गर्ने भएको छ ।

कोभिडको संक्रमण दिनानुदिन बढ्दै गइरहेको र कार्यालयमा खोप कार्डको व्यवस्था अनिवार्य गर्दा पनि भीड कम नभएपछि आलोपालो गरी सेवा प्रवाह गर्न लागिएको होे । सोमबार बसेको कोभिड व्यवस्थापन समितिको बैठकले गरेको निर्णय बमोजिम सेवाग्राहीलाई कार्यालयबाट प्रदान गरिने सेवा आलोपालो माध्यमबाट दिने व्यवस्था मिलाइएको सहायक प्रजिअ काशीराम गैरेले जानकारी दिए ।

उनका अनुसार आइतबार, मंगलबार, बिहीबार तीन दिन व्यास, भानु, बन्दीपुर, देवघाट आँबुखैरेनी गाउँपालिका क्षेत्रका सेवाग्राहीलाई सेवा प्रदान गरिनेछ । त्यसैगरी, सोमबार, बुधबार र शुक्रबार शुक्लागण्डकी तथा भिमाद नगरपालिका र म्याग्दे, ऋषिङ तथा घिरिङ गाउँपालिकाका लागि पालो मिलाइएको बताइएको छ ।