काठमाडौँ : कांग्रेससँगको गठबन्धनले माओवादीका सबै उम्मेद्वारले जित्न नसकेपछि प्रचण्डलाई फकाउन एमाले अध्यक्ष केपी शर्मा ओलीले टेलिफोन गरेका छन् । बिहीबार दिउँसो ओली र प्रचण्डबीच टेलिफोन कुराकानी भएको दुवै अध्यक्षका सचिवालयले जनाएका छन् ।

कांग्रेससँगको गठबन्धनले माओवादीका केही उम्मेद्वार पराजित भएपछि प्रचण्ड केही असन्तुष्ट देखिएका छन् । कांग्रेसले इमान्दार भएर भोट नहाल्दा माओवादी उम्मेद्वार रहेका क्षेत्रमा रवि लामिछानेको पार्टीका उम्मेद्वार विजयी भएका छन् ।

कांग्रेसकै भोटले गर्दा काठमाडौँमा धेरै कम्युनिष्ट उम्मेद्वार पराजित भएका छन् । स्वयंम माओवादी नेताहरुले पनि कांग्रेससँगको गठबन्धन एमालेजति फलदायी हुन नसकेको टिप्पणी गरिरहेका छन् । यस्तो बेलामा यसपटकको चुनावको सबै मतपरिणाम नआउँदै ओली प्रचण्डलाई फकाउन हतारिएका छन् ।

माओवादीसँगको सहकार्य टुटेपछि एमालेका धेरै नेताहरु पराजित हुन पुगेका छन् । यसले सबैभन्दा ठूलो समस्यामा एमाले परेको छ । अहिलेका परिणामले एमाले सरकार बनाउनै नसक्ने अवस्थामा पुगेको छ । माओवादी पनि निकै कमजोर अवस्थामा पुगेको छ ।

पछिल्लो मतपरिणामअनुसार पहिलो स्थानमा रहेको कांग्रेसले ३२ सिट जितेको छ भने एमालेले २० सिट मात्रै जितेको छ । यस्तै माओवादीले अहिलेसम्म ९ सिट जित्दा माधव नेपालको पार्टीले ७ सिट जितेको छ । यस्तै यसै चुनावबाट उदाएको राष्ट्रिय स्वतन्त्र पार्टीले पनि अहिलेसम्म ७ सिट जितेको छ ।