काठमाडौँ– फिल्म  ‘प्रेमगन्ज’ को शीर्ष गीत सार्वजनिक गरिएको छ । परिच्छेद सेनको डेब्यु निर्देशन रहेको  ‘प्रेमगन्ज’ को शीर्ष गीत  ‘माथि माथि आकाशमा’ मा बेनिशा हमाल, तेज गिरि, राइडर प्रशन, सुप्रिया खनाल फिचर्ड छन् । दुई कालखण्डको प्रेमकथालाई प्रस्तुत गर्ने फिल्ममा तेज र बेनिशाले युवा उमेरका मैनाराजाको भूमिकामा अभिनय गरेका छन भने प्रशन र सुप्रियाले टिनएजर मैनाराजाको भूमिका निर्वाह गरेका छन् ।

गीतको कोरियोग्राफीमा एक अर्कामा अगाध प्रेम देखाइए पनि एकले अर्कोलाई नछोई प्रेमभाव प्रदर्शन गरेका छन् ।  कोरियोग्राफीको यो शैलीलाई प्रष्ट पार्दै निर्देशक परिच्छेद भन्छ्न् ‘फिल्मको टर्निङ पोइन्ट त्यही नै हो र  सम्पूर्ण कथा उनीहरूको त्यही माया गर्ने शैली भित्र लुकेको छ ।’ टिनएजदेखि युवाअवस्थासम्म एकले अर्कोलाई नछोई कसरी प्रेम गर्न सके ? यो कौतुहलता मेटाउन हल जानुपर्ने निर्देशक परिच्छेदको जिकिर छ । गीतको कोरियाग्राफी निर्देशक परिच्छेद स्वयंले गरेका हुन् । 

सार्वजनिक गीतमा पुरुषोत्तम ढुङ्गेलको शब्द रचना छ भने किरण भुसालको संगीत रहेको छ । सुगम पोख्रेल र अस्मिता अधिकारीको आवाज रहेको गीतलाई सञ्जय लामाले छायांकन गरेका हुन् । अनन्तमान श्रेष्ठ कार्यकारी निर्माता रहेको फिल्मको लेखक पनि परिच्छेद सेन नै हुन । फिल्म भदौ ३ मा प्रदर्शन हुनेछ ।