काठमाडौँ– अभिनेत्री दीया पुन: सगरमाथा आरोहनको क्रममा बेस क्याम्पमा पुगेकी छन् ।

बेस क्याम्प पुगेपछि दीयाले नेपालको राष्ट्रिय झण्डासँगै आफू अभिनित प्रदर्शनको क्रममा रहेको फिल्म ‘मन्त्र’ को पोस्टरसहित फोटो सार्वजनिक गरेकी छन् ।

वैशाख १६ गतेबाट प्रदर्शमा आउने फिल्मको प्रचारमा आफू उपस्थित हुन् नपाए पश्चात सहयोग पुगोस भन्ने हेतुले तस्बिर सार्वजनिक गरिएको दीयाले बताइन । ‘निकै रमाइलो अनुभूति भइरहेको छ । अब केही दिनमै आफ्नो गन्तव्यमा पुग्नेछु’ दीयाले बताइन् ।

५ हजार ३ सय ४८ मिटरको उचाईमा पुगेकी दीया आफ्नो गन्तव्यमा निरन्तर अगाडि बढिरहेकी छन् । खिलबहादुर गुरुङ निर्देशित फिल्म ‘मन्त्र’ मा दीयासँगै सौगात मल्ल , बुद्धि तमाङ्गलगायत मुख्य भूमिकामा छन् । हिमाली भेगको सुन्दर दृश्यहरू कैद गरिएको फिल्ममा हिमाली प्रेम कथा र संस्कृतिलाई देखाइएको छ । गोर्खाको चुमनुब्री सामा गाउँ, वीरेन्द्र ताल र पुङ्गिन गुम्बालगायतका रमणीय दृश्यहरू फिल्ममा देखिने भएकाले आन्तरिक पर्यटन बढ्नेमा समेत निर्माण पक्ष आशावादी छ । परिक्षेद सेनको कथा रहेको फिल्ममा साम्तेन भुटिया, सुनिल निउरे र सेन स्वयंको पटकथा, सन्तोष सुनारको संगीत, सञ्जय लामाको छायांकन एवं मित्र डि.गुरुङको सम्पादन छ ।