काठमाडौं– युक्रेनी सेनाले रुसी सैनिक कमाण्ड पोस्टलाई लक्षित गरी आक्रमण गर्दा दुई वरिष्ठ रुसी सैनिक अधिकारी मारिएका छन् ।

युक्रेनबाट रुसले कब्जामा लिएको दक्षिणी शहर खेर्सनमा रहेको रुसी सैनिक कमाण्ड पोस्टलाई लक्षित गरी आक्रमण गरिएको युक्रेनी सेनाले जनाएको हो ।

आक्रमणका क्रममा रुसी सेनाका दुई जर्नेलहरु मारिएको बताइएको छ । समाचार संस्था एपीका अनुसार युक्रेनी सेनाले आक्रमणका क्रममा अर्का एक जर्नेल घाइते भएको दाबी गरिएको छ । हताहत भएको भनिएका जर्नेलहरुको पहिचान हुन सकेको छैन ।

आक्रमणका बेला उक्त कमाण्ड पोस्टमा ५० भन्दा धेरै वरिष्ठ रुसी सैनिक अधिकारीहरु रहेको युक्रेनी राष्ट्रपति भोलोदिमिर जेलेन्स्कीका सल्लाहकार ओलेक्सेई एरेस्तोभिचले जनाएका छन् ।

उनीहरुको अवस्था अज्ञात रहेको उनको भनाइ छ । यसबारे रुसी पक्षबाट कुनै टिप्पणी नआएको एपीले जनाएको छ ।