काठमाडौँ– काठमाडौँमा भएको अन्तर्राष्ट्रिय उद्यमशीलता कन्क्लेभ–कनेक्ट (इन) सम्पन्न भएको छ ।

भारतीय राजदूतावासले भारत स्वतन्त्र भएको ७५ वर्षको उत्सव मनाउन भारत सरकारले अघि सारेको ‘आजादीका अमृत महोत्सव’ अन्तर्गत गरिएको कनक्लेभ सम्पन्न भएको हो ।

भारत र नेपालका स्टार्टअप इकोसिस्टमबीचको सम्बन्धलाई थप मजबुत बनाउन कनक्लेभ गरिएको भारतीय राजदूतावासले जनाएको छ ।

कनेन्ट (इन) मा नेपाल र भारतका युवा उद्यमीहरू, लगानीकर्ताहरू, उद्यम पुँजीपतिहरू र विज्ञहरूलाई विचारदेखि व्यापार मोडलसम्म, समस्यादेखि समाधानसम्म र व्यवसायदेखि लगानीसम्मका विविध विषयमा एकअर्काका अनुभवहरू साटासाट गरिएको थियो ।

ई–कमर्श, जीवन विज्ञान, फिनटेक, शिक्षा प्रविधि, सामाजिक उद्यमशीलता, खाद्य प्रविधि तथा वित्तीय सेवाहरू जस्ता विविध क्षेत्रमा क्रियाशील भारतका पाँच जनासहित करिब २५ जना उद्यमीहरूले यो कनक्लेभमा सहभागी भएका थिए ।

भारतीय राजदूत विनयमोहन क्वात्रा र सञ्चार तथा सूचना प्रविधिमन्त्री ज्ञानेन्द्रबहादुर कार्कीले कनेक्ट  (इन) को तेस्रो संस्करणको उद्घाटन गरेका थिए ।

कनक्लेभका सह–आयोजकमा क्लोक बी बिजिनेश इनोभेशसन्स तथा प्रमुख साझेदारमा जीएमआर, टाटा मोटर्स, टाटा मेडिटेक र टुटल समावेश थिए ।

कनेक्ट (इन) ले भारत र नेपालका इनोभेटर, प्रतिष्ठित व्यक्ति र चिन्तकहरूलाई एकै ठाँउमा ल्याई दुवै देशका नवीन पद्धति र उद्यमशीलतालाई प्रवर्द्धन गर्न मद्दत गर्दै आएको छ ।
यसअघि पनि दुई पटक यो कनक्लेभ भइसकेको छ ।