काठमाडौँ : मधेसमा नयाँ शक्तिका रुपमा चन्द्र कान्त अर्थात सीके राउतको उदय भएको छ । जनमत पार्टी खोलेर राजनीतिमा होमिएका सीके राउतले यसपटक मधेसमा नयाँ तरंग ल्याएका छन् । उनले आफ्नो पार्टी मात्रै होइन, मधेस भजाएर राजनीति गर्नेको ‘पसल’ बन्द गराइदिने अवस्था सिर्जना गरेका छन् ।

सप्तरी २ बाट प्रतिनिधिसभा चुनाव लडेका सीके राउतले ३५ हजार मतसहित जित हासिल गरेका छन । झण्डै दशक लामो वैचारिक र सडक संघर्षबाट उठेका सीके राउतले यसपटक मधेसको प्रतिनिधि गर्दै चुनाव जितेर संसद्मा नयाँ अनुहारका रुपमा भित्रिने भएका छन् ।

सप्तरी महदेवा घर भएका सीके राउतले बेलायतको क्याम्ब्रिज विश्वविद्यालय पढेका छन् । सोही विश्वविद्यालयबाट पीएचडी गरेका राउतले नेपालमा आएर सुरुमा स्वतन्त्र मधेसको नारा लगाएका थिए । तर त्यसैबाट चर्चित भएका उनले अहिले पार्टी खोलेर राजनीति गर्ने ठाउँ बनेको हो ।

अभियान चलाउँदा पटक पटक पक्राउ परेर चर्चामा आएका उनी अहिले जनमत पार्टी खोलेर मधेसको प्रतिनिधित्व गर्दै संसदमा गर्जने नेताका रुपमा स्थापित हुँदैछन् । सीके राउतले २०७५ सालमा केपी शर्मा ओली नेतृत्वको सरकारमा ११ बुँदे सहमति गरेर खुला राजनीतिमा आएपछि झन् राजनीतिक उचाई लिएका थिए । जसलाई मधेसका जनताले यसपटकको चुनावबाट अनुमोदन गरेका छन् ।

सीके राउतको उदयले दुई दशक राजनीति गरेका मधेसका ठूला भनिएका जसपा, लोसपा यतिबेला खुम्चिएका छन् । मधेसमा सीके राउतको उदयले उपेन्द्र यादव, महन्थ ठाकुर, राजेन्द्र महतो लगायत वर्षौ वर्ष मधेसकै राजनीति गरेका नेताहरु भने अब पाखा लाग्ने देखिएको छ ।

यो पनि पढ्नुहोस्ः

१८ हजार मतान्तरले सीके राउत विजयी