काठमाडौं – प्रधामन्त्री शेरबहादुर देउवा डडेलधुराबाट सातौं पटक संसदमा निर्वाचित भएका छन्। बुधबार कांग्रेस उम्मेदवार देउवा २५ हजार ५३४ मतसहित विजयी भएका हुन्। उनँका निकटतम प्रतिद्वन्द्वी स्वतन्त्र सागर ढकालले १३ हजार ४२ मत ल्याएका छन्। साढे १२ हजार मतान्तरसहित देउवा विजयी भएका हुन् ।

डडेलधुराबाट देउवा २०४८ सालपछि लगातार संसदमा निर्वाचित हुँदै आएका छन्। एक मात्रै प्रतिनिधिसभा क्षेत्र रहेको डडेलधुरामा यस पटक देउवालाई हराउन स्वतन्त्र उम्मेदवार सागर ढकाल र एमालेको साथ पाएका बीपी कांग्रेसका मल्ल असफल भएका हुन्। यो जितसँगै देउवाले इतिहास रचेका छन्। डडेलधुरामा देउवाको उदयलाई निर्विकल्प रुपमासमेत हेरिएको छ।

देउवा वि.सं. २०४८, २०५१ र २०५६ का संसदीय निर्वाचनमा डडेलधुरा जिल्लाबाट निर्वाचित भए। यो अपराजित यात्रालाई २०६४ र २०७० मा भएको संविधान सभाको निर्वाचनमा उनले निरन्तरता पाए।

यसअघिको संवैधानिक प्रावधान अनुसार एकसाथ दुई ठाउँमा उम्मेदवारी दिन पाइने हुँदा देउवा डडेलधुराका साथै कञ्चनपुर र कैलालीबाटसमेत विजयी भएका थिए। २०७४ सालको प्रतिनिधिसभा सदस्य निर्वाचनमा डडेलधुराबाटै विजयी देउवा अहिले सातौं पटक विजयी भएका हुन्। देउवाको यो यात्रालाई ऐतिहासिक मानिएको छ।