काठमाडौँ– मादक पदार्थ सेवन गरी प्रहरीमाथि अभद्र व्यवहार गर्ने दुई जना पक्राउ परेका छन् । ट्राफिक प्रहरीको नियमित रात्रिकालिन चेकीङ क्रममा उनीहरुले प्रहरीमाथि अभद्र व्यवहार गरेका हुन् ।

पक्राउ पर्नेमा धादिङको बेनिघाट रोराङ गाउँपालिका २ घर भइ हाल काठमाडौँको टोखा बस्दै आएका सरोज श्रेष्ठ र धुलिखेल नगरपालिका ११ घर भएका ४० वर्षीय अनिल धिताल रहेका छन् । पक्राउ परेका मध्ये श्रेष्ठ बस चालक हुन भने धिताल ट्याक्सी चालक हुन् ।

किर्तिपुरको त्रिभुवन विश्वबिद्यालय अगाडीको सडकमा बा ३ ख ४३ ८३ नम्बरको भाडा बसका चालक श्रेष्ठ, मादक पदार्थ सेवन गरी सवारी साधन चलाएको अवस्थामा भेटिए पछि प्रहरीले कारबाही गर्न खोजेको थियो तर उनले उल्टै प्रहरीमाथि नै अभ्रद व्यवहार गरे । त्यस्तै भक्तपुरको जगातीमा गएराती भएको ट्राफिक प्रहरीको चेकिङमा बा २ ज ५६ १५ नम्बरको ट्याक्सी चालक धितालले पनि मादवक पदार्थ सेवन गरी ट्याक्सी चलाई रहेको पाएपछि पक्राउ गरेको हो ।

पक्राउ परेका धिताल उपर अभद्र व्यवहार मुद्धामा ७ दिन म्याद थप अनुमती लिइ प्रहरी वृत्त जगातीमा राखेर अनुसन्धान भइरहेको काठमाण्डौ उपत्यका ट्राफिक प्रहरी कार्यालयका प्रवक्ता एवं प्रहरी वरीष्ठ उपरीक्षक राजेन्द्र प्रसाद भट्टले जानकारी दिए ।