बारा- बाराको जितपुरसिमरा २० निवासी दीपक पासवानको हत्या आरोपित दुई जनालाई बारा प्रहरीले पक्राउ गरेको छ ।

स्थानीय राजबंशी पासवानका २५ वर्षिय छोरा दीपक पासवानको हत्या गरी पुरेको अवस्थामा जेठ ६ गते शब फेला परेको थियो । सोही हत्या आरोपमा उपमहानगरपालिका वडा नम्बर २० बसडिलवा टोल बस्ने शेख मीर हसनका छोरा वर्ष २० का शेख नवि आलम र सोही  ठाउँ बस्ने शेख जैनुलका छोरा वर्ष २१ का शेख सलिम पक्राउ परेका हुन् ।

प्रहरीका अनुसार उनिहरुले मृतक दीपक पासवानको घाटीमा धारिलो घरेलु हतियार बखुवा (खुर्पा) ले  घाँटी रेटी हत्या गरेको प्रहरीको प्रारम्भिक अनुसन्धानबाट खुलेको बाराका प्रहरी प्रवक्ता राजेश थापाले जानकारी दिए । पासवानको शब पनि उपमहानगरपालिकाको वडा नम्बर २० बसडिलवा गोठ टोलदेखि करिब ५०० मिटर दक्षिणमा पर्ने कठोह खोला छेउमा बालुवामा पुरिएको अवस्थामा प्रहरीले फेला परेको थियो ।

उनिहरु पासवानको हत्यापछि फरार रहेका थिए । आइतबार पक्राउ परेका दुवै जनामाथि कर्तव्य ज्यान मुद्दामा जिल्ला अदालत बाराबाट ७ दिनको म्याद लिई हिरासतमा राखेर अनुसन्धान थालेको बारा प्रहरीले जनाएको छ ।