काठमाडौँ- बलात्कार आरोपमा पक्राउ परेका मनोज पाण्डेविरुद्ध दुई फरक आरोपमा मुद्दा दर्ता भएको छ ।

पाण्डेमाथि मानवबेचबिखन र यौन दुर्व्यवहारको आरोपमा मुद्दा दर्ता गरिएको काठमाडौँ महानगरीय प्रहरी परिसर काठमाडौँका प्रमुख एसएसपी सुदीप गिरीले जानकारी दिए । 

आठ वर्षअघि मिस ग्लोबल इन्टरनेसनलमा भाग लिएकी एक युवतीले आफूमाथि पाण्डेले पटक–पटक बलात्कार गरेको आरोप लगाउँदै सामाजिक सञ्जालमा भिडियो सार्वजनिक गरेकी थिइन् । यो घटना सार्वजनिक भएपछि अर्की एक किशोरीले पनि पाण्डेले आफूमाथि पनि बलात्कार प्रयास गरेको भन्दै जाहेरी प्रहरीमा दिएकी छन् । 

पक्राउ परेका पाण्डेमाथि ८ वर्ष अघिको घटनामाथि जाहेरी दिने १ वर्षे हद म्यादका कारण प्रहरीले मानव बेचबिखनविरुद्ध मुद्दा दर्ता गरेको र अर्की किशोरीको जाहेरीको आधारमा यौन दुर्व्यवहारको मुद्दा चलाएको महानगरीय प्रहरी परिसर प्रमुख गिरीले बताए । 

उमेरले नाबालिग भएकाले उनको केसमा हदम्याद आकर्षित नहुने उनको भनाइ छ । आरोपी पाण्डेलाई म्याद थपका लागि जिल्ला अदालत काठमाडौँ लगिएको पनि गिरीले बताए ।