काठमाडौं- उत्तर कोरियामा ७८ प्रतिशत ‘ज्वरो’ का बिरामी निको भएका उत्तर कोरियाको सरकारले जनाएको छ ।

उत्तर कोरियाको आधिकारिक समाचार संस्था कोरियन सेन्ट्रल न्युज एजेन्सी (केसिएनए) ले जनाएअनुसार केही दिनदेखि ज्वरोको प्रकोप बढेको भएपनि अहिलेसम्म ७८ प्रतिशत भन्दा बढी निको भएका छन् ।

त्यहाँ अप्रिल महिनाको अन्त्यबाट ठूलो सङ्ख्यामा नागरिकहरूमा ‘ज्वरो’ को प्रकोप बढेको थियो । त्यस प्रकोपमा कम्तीमा पनि २६ लाख ४० हजार नागरिक परेका थिए । उनीहरूलाई केहीलाई अस्पताल भर्ना गरिएको थियो भने केहीको घरमै उपचार भएको थियो ।

गत शनिबार रातिसम्ममा २० लाख ६० हजार ज्वरोका बिरामी निको भएका थिए, भने अरु केहीलाई उपचार जारी रहेको बताइएको छ ।

सो समाचार संस्थाका अनुसार त्यहाँ ‘ज्वरो’ को प्रकोपका कारण ६७ जनाको ज्यान गएको थियो । सुरुमा ‘ज्वरो मात्र भनिएकामा पछि कतिपय नागरिकमा कोरोना भाइरसको संक्रमण पनि देखिएको थियो ।

तर उत्तर कोरियाली सरकारले यसलाई कोरोनाको प्रकोप नभएर ज्वरो मात्र भएको बताएको छ ।