काठमाडौँ– अविनाशविक्रम शाहको छोटो फिल्म कान्स फिल्म फेस्टिभलमा छानिएको छ ।  

योसँगै नेपालबाट प्रतिस्पर्धात्मक विधामा अफिसियल छनौट हुने ‘लोरी’ पहिलो फिल्म बनेको छ ।  शुक्रबार साँझ सार्वजनिक लाइनअप अनुसार शाहको निर्देशन रहेको ‘लोरी’ समावेश छ।  ‘कालो पोथी’ का लेखक अविनाश विक्रम शाहले थुप्रै अवार्डे लघु फिल्मको निर्देशन गरेका छन् । उनले बनाउन लागेको पहिलो फिचर फिल्म ‘झ्यालिन्चा’ निर्माणको क्रममा रहेको छ । 

१ सय ४० देशका ३५ सय बढी फिल्मबाट ‘लोरी’ ले उत्कृष्ट ९ मा स्थान बनाएको हो । नेपालले अब चीन, साउथ कोरिया, कोस्टारिका, अमेरिका, फ्रान्स, घाना र लिथुनियाका फिल्मसँग प्रतिस्पर्धा गर्नेछ । हङकङको फिल्म कम्पनीको समेत निर्माण रहेको १४ मिनेटको ‘लोरी’ मे २८ का दिन आफ्नो भाग्य निर्धारण गर्नेछ । 

यसअघि कान्समा थुप्रै फिल्मकर्मीका फिल्म अनेक विधामा छानिएको भए पनि अफिसियल छानिएको पहिलो पटक हो । कान्समा गत वर्ष मात्र किरण पोखरेलको ‘विङस्’ नेस्प्रेसो ट्यालेन्ट इन्टरनेसनल कन्टेस्टमा ग्रयान्ड प्राइज जितेको थियो । 

यसअघि फिडेल देवकोटाको फिल्म ‘काङलिङ’ को पटकथा पनि कान्समा छानिएको थियो । कान्सकै अघिल्ला वर्षहरूमा मीनले बन्न लागेको फिल्म ‘चिसो वर्ष’ का लागि ६६ लाख बराबरको फन्ड जितेका थिए । मे १७ देखि सुरु हुने फेस्टिभल २८ मा समापन हुँदैछ । फिचर फिल्ममा जस्तै सर्ट फिल्मको विधातर्फ पनि उत्कृष्ट हुने फिल्मलाई पाम डी अर प्रदान गर्ने गरिन्छ ।