मोरङ– भारत सरकारको सहयोगमा मोरङको विराटनगरमा निर्मित आरोहण–गुरुकुल नाट्यशाला भवनको उद्घाटन गरिएको छ ।

विराटनगर महानगरपालिकाका नगर प्रमुख भीम पराजुली र भारतीय राजदूतावासका द्वितीय सचिव प्रशान्तकुमार सोनाले आज नाट्यशाला भवनको उद्घाटन गरेका हुन् ।

शिक्षा–संस्कृति क्षेत्रमा भारत सरकारको आर्थिक सहयोगमा आरोहण–गुरुकुल नाट्यशाला निर्माण गरिएको हो ।

नेपाली रुपैयाँ ३ करोड ५१ लाखको लागतमा निर्माण गरिएको यो परियोजना भारत स्वतन्त्र भएको ७५ वर्षको उत्सव मनाउन भारत सरकारले अघि सारेको ‘इन्डिया एट ७५ आजादीका अमृत महोत्सव’ अन्तर्गत यस वर्ष नेपालमा उद्घाटन गरिने ७५ वटा परियोजनाहरूमध्येको एक हो ।

आरोहण–गुरुकुल नाट्य समूहले नेपाली रंगमञ्चको प्रबर्द्धनमा योगदान पुर्‍याउँदै आएको छ । साथै, नयाँ दिल्लीस्थित नेशनल स्कूल अफ ड्रामा लगायत भारतका विभिन्न नाट्य समूहसँग पनि यो समूहको सुमधुर सम्बन्ध रहँदै आएको छ ।