काठमाडौं–नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले प्रतिक्रान्तिहरु फेरि पुरानै सत्ता उल्ट्याउन कोसिस गरिरहेको बताएका छन् । उनले सामाजिक सञ्जाल फेसबुकमा विश्व इतिहासमा हरेक क्रान्तिपछि प्रतिक्रान्तिहरु यसरी नै सत्ता उल्ट्यान प्रयास गर्ने गरेको लेखेका छन् ।

‘विश्व इतिहासमा हरेक क्रान्तिपछि प्रतिक्रान्तिकारीहरू फेरि पुरानै सत्ता उल्ट्याउन भरमग्दूर कोसिस गर्छन्’, उनले लेखेका छन्, ‘अहिले नेपालमा पनि क्रान्ति र प्रतिक्रान्तिकारीहरूबीच संघर्ष चलिरहेको छ। उनीहरूले कैयन् षड्यन्त्र रचिरहेका र भ्रम छरिरहेका छन् । तर, हामी ती सबै प्रपञ्चको जालो चिरेर विजयी हुनेछौं ।’

अमेरिकी सहायता परियोजना एमसीसीले सत्ता गठबन्धन भत्कने आशंका बढाइरहेका बेला प्रचण्डको यो भनाई आएको हो । प्रधानमन्त्री शेरबहादुर देउवाको नेतृत्वको सरकारले संघीय संसदमा एमसीसीलाई टेबल गरेपछि अहिले माओवादी र एकीकृत समाजवादी विपक्षमा उभिएका छन् । यहीकारण देउवाले पछिल्लो दिनमा नेकपा एमालेका अध्यक्ष केपी शर्मासँग भेटघाटको क्रम बढाइरहेका छन् ।