काठमाडौँ- काठमाडौँ जिल्ला अदालतले मानव बेचविखनमा संलग्न दुई चिनियाँ नागरिकलाई पुर्पक्षका लागि थुनामा पठाउन आदेश दिएको छ ।

आकर्षक तलब र रोजगारीको लोभ देखाएर विदेशमा बिक्री गरेको कसूरमा अदालतले चिनियाँ नागरिकहरु छोवाङ रुङ र चेन याङलाई पुर्पक्षका लागि थुनामा पठाउन आदेश दिएको हो ।

धेरै तलब प्राप्त हुने लोभ देखाएर एजेण्टमार्फत सम्पर्कमा आएका युवालाई विदेश पुर्‍याउने र गैरकानूनी गतिविधिमा लगाउने कार्यमा उनीहरुको संलग्नता खुलेको छ । उनीहरुले १० जना नेपालीलाई बिक्री गरेको र अरु धेरैलाई विदेश पुर्‍याएको आशंकामा प्रहरीले अनुसन्धान गरिरहेको जनाइएको छ ।

दुई जना चिनियाँबाहेक उक्त कार्यमा संलग्न केही नेपालीलाई पनि अनुसन्धानको दायरमा ल्याइएको प्रहरीले जनाएको छ । उनीहरूले नेपाली एजेन्टको प्रयोग गरी नेपालीलाई भारत हुँदै थाइल्याण्ड पुर्‍याउने गरेको र त्यहाँबाट गाडीमा लाओस पठाइ बेचेको प्रहरीले जनाएको छ ।

लाओसमा सेल्स मार्केटिङको काममा एक हजारदेखि १५ सय डलरसम्म मासिक पारिश्रमिक पाउने लोभ देखाएर उनीहरुले मानिसहरुलाई लाओस पठाउने गरेका थिए ।