काठमाडौँ– चीनको सत्तारुढ कम्युनिष्ट पार्टीको महाधिवेशन शनिबार सम्पन्न भएको छ । राष्ट्रपति सी जिन्पिङको शक्ति थप सुदृढीकरण गर्दै कम्युनिष्ट पार्टीको २० औँ महाधिवेशन शनिबार सम्पन्न भएको हो ।

पार्टीको महाधिवेशनले संविधानमा सी जिन्पिङ विचारधारालाई मजबुत बनाउनेगरी ‘दुई स्थापना’ र ‘दुई सुरक्षा’ नामक संशोधन समेत पारित गरेको बेलायती अखबार द गार्जियनको अनलाइन संस्करणले जनाएको छ । यससँगै पार्टीले सी जिन्पिङ विचारधारालाई आधारभूत राजनीतिक सिद्धान्तका रुपमा पनि अघि सारिएको जनाइएको छ ।

महाधिवेशनले २०५ जना केन्द्रीय समिति पनि चयन गरेको छ । केन्द्रीय समितिमा वर्तमान प्रधानमन्त्री ली खछ्याङ र गुआङडोङ प्रान्तका पार्टी प्रमुख वाङ याङसहित पार्टीका केही महत्वपूर्ण व्यक्तित्वलाई भने समावेश गरिएको छैन । वाङलाई नयाँ प्रधानमन्त्रीका रुपमा हेरिएको थियो । पार्टीले आइतबार पोलिटब्युरो स्थायी समिति चयन गर्ने जनाइएको छ ।

पार्टीले आइतबार स्थानीय समयअनुसार मध्याह्न १२ बजे ग्रेट हल अफ पिपुलमा पत्रकारहरुमाझ नयाँ नेतृत्व सार्वजनिक गर्ने अन्तर्राष्ट्रिय समाचार संस्था रोयटर्सले जनाएको छ । आइतबार नै पार्टीले सीलाई ऐतिहासिक तेस्रो कार्यकालका लागि महासचिव र राष्ट्रपतिका रुपमा अनुमोदन गर्ने अपेक्षा गरिएको छ ।

वर्तमान प्रधानमन्त्री लीलाई बाहिर राख्दै केन्द्रीय समितिको चयन भएसँगै विश्लेषकहरुले पोलिटब्युरो स्थायी समितिमा राष्ट्रपति सीका समर्थकहरुको बर्चश्व रहने र पार्टीमा सीको पकड अझ मजबुत हुने टिप्पणी गरेका छन् ।