काठमाडौँ– काठमाडौंस्थित भारतीय राजदूतावासले भारतकी नवनियुक्त राष्ट्रपति द्रौपदी मुर्मूको कुनै ट्विटर खाता नभएको जनाएको छ ।

भारतमा पहिलोपटक आदिवासी समूदायबाट राष्ट्रपति निर्वाचित भएपछि नेपालका प्रधानमन्त्री शेरबहादुर देउवाले ट्वीटरमार्फत मुर्मूलाई बधाई दिएका थिए ।

दौपद्री मुर्मू नामको फेक खाता बनाएर सो खाताबाट देउवाको ट्वीटलाई कोट गरी धन्यवाद व्यक्त गरिएको थियो । दूतावासले सो ट्वीटर खाता आधिकारिक नभएको स्पष्ट पारेको हो ।

भारतमा राष्ट्रपति पदका लागि गत सोमवार मतदान भएको थियो । अन्तिम मत परिणामअनुसार मुर्मूले विपक्षी दलका उम्मेदवार यशवन्त सिन्हालाई व्यापक मतान्तरले पराजित गरेकी हुन् । मुर्मूले ६४.०३ मत प्राप्त गरिन् भने सिन्हाले ३५.९७ प्रतिशत मत प्राप्त गरे ।

उनलाई विपक्षी दलका मतदाताहरूले समेत भोट हालेको पाइएको भारतीय सञ्चारमाध्यमहरूले जनाएका छन् ।