काठमाडौँ– बायर्न म्युनिख क्लबमा जानु अगाडि साडियो मानेले लिभरपुल क्लबको यात्राको समीक्षा गरेका छन् । लिभरपुलले आज सार्वजनिक गरेको एक भिडियोमा मानेले आफू लिभरपुलको समर्थकहरुपश्चात सबैभन्दा ठुलो समर्थक भएको बताए ।

 लिभरपुलको गृह मैदान एन्फिल्डमा खेल्दा छुट्टै उर्जा पाउने मानेले बताए । करिब ६ वर्ष लिभरपुलमा आवद्ध भएका मानेले लिभरपुलको लागि कुल १ सय २० गोल गरे । ६ सिजनमा मानेले लिभरपुलका लागि कुल २ सय ६९ खेलमा उपस्थिति जनाएका छन् ।  उनले आर्सनलविरुद्ध गरेको पहिलो गोल र बार्यन म्युनिखविरुद्ध गरेको दोस्रो गोल लिभरपुलको यात्राको यादगार गोल भएको बताए । 

लिभरपुललाई च्याम्पियन्स लिग, फिफा क्लब विश्व कप, यूईएफए सुपरकप, इङ्ग्लिश प्रिमियर लिग, इङ्ग्लिश लिग कप, र इङ्लिश एफए कपको उपाधि जित्न मानेले महत्वपूर्ण भूमिका खेले । सन् २०१६ मा लिभरपुलमा जोडिएका मानेले लिभरपुलको यात्रालाई शुभकामना व्यक्त गर्दै क्लबबाट बिदा भए ।