काठमाडौं– रुसी फौजको चौतर्फी घेराबन्दीमा परेको मारिउपोलमा रहेका युक्रेनी फौजका कमाण्डरले शहरलाई अझै रुसले कब्जा गर्न नसकेको दाबी गरेका छन् ।

एजोभस्तल औद्योगिक क्षेत्रबाट बीबीसीसँग कुरा गर्दै सो क्षेत्रमा रहेका युक्रेनी फौजका कमाण्डर स्वातोस्लाभ पलामारले आफूहरूले रुसी फौजको आक्रमण निस्तेज पारेको समेत जानकारी गराए ।

‘मेले जहिल्यै पनि भन्दै आइरहेको छु, जबसम्म हामी यहीँ छौँ, तबसम्म मारिउपोल युक्रेनकै नियन्त्रणमा रहनेछ ।’ उनलाई उद्धृत गर्दै बीबीसीले जनाएको छ ।

यसअघि बिहीबार रुसी राष्ट्रपति भ्लादिमिर पुटिनले मारिउपोल जितेको दाबी गरेका थिए । मारिउपोलका अधिकांश क्षेत्र रुसी सेनाको नियन्त्रणमा रहेपनि एजोभस्तल औद्योगिक क्षेत्र भने अझै युक्रेनी फौजले रुसी आक्रमणको प्रतिकार गरिरहेको बताइएको छ ।

बिहीबार रक्षामन्त्री सर्गेई सोइगुसँगको भेटमा पुटिनले एजोभस्तलमा आक्रमण गर्नु अनावश्यक रहेको बताएका थिए ।

उनले सोइगुलाई एजोभस्तललाई ‘झिँगा समेत उम्किन नसक्नेगरी’ घेराबन्दीलाई अझ बलियो बनाउन निर्देशन दिएका थिए ।