काठमाडौं- इंग्लिस प्रिमियर लिग फुटबलमा लिड्स युनाईटेडसँग चेल्सी पराजित भएको छ ।आइतबार राति भएको खेलमा चेल्सीले लिड्ससँग ३–० को लज्जास्पद हार बेहोरको हो ।

लिड्सलाई जित दिलाउन ब्रेण्डन आरोनसन, रोड्रिगो मोरेनो र ज्याक ह्यारिसनले एक एक गोल गरे ।

खेलको ३३ औं मिनेटमा आरोनसनले गोल गर्दै लिड्सलाई सुरुआती अग्रता दिलाएका थिए ।३७ औं मिनेटमा मोरेनोले गोल गर्दै टिमको अग्रता २–० को बनाए ।त्यसपछि खेलको ६९ औं मिनेटमा ह्यारिसनले गोल गर्दै लिड्सलाई ३–० को जित दिलाए ।

८५औं मिनेटमा १० खेलाडीमा समेटिएपछि चेल्सीको खेलमा फर्कने सम्भावना पनि टाढियो । यसै समरमा क्लबमा भित्रिएका कालिडु कौलिबाली दोहोरो पहेंलो कार्ड खाँदै मैदानबाट बाहिरिएका थिए ।

जितसँगै लिड्स दोस्रो स्थानमा उक्लिएको छ ।लिड्सले ३ खेलमा ७ अंक जोडेको छ । चेल्सी ३ खेलमा ४ अंक जोडेर १२ औं स्थानमा रहेको छ ।