काठमाडौं- भारतको आसाम राज्यमा अविरल वर्षापछि आएको बाढी र पहिरोबाट पीडित ५ सयभन्दा बढी परिवार रेलमार्गको ट्रयाकमा बस्न बाध्य भएका छन् ।

बाढीको पानीले नडुबेको जमुनामुख जिल्लाका गाउँका मानिसहरू ट्रयाकमा बस्न बाध्य भएको भारतीय सञ्चारमाध्यमले जनाएका छन ।

हालै भीषण वर्षापछि आएको बाढी र पहिरोले उनीहरूको घर बगाएको भारतको वान इण्डिया अनलाइन समाचार पोर्टलले जनाएको छ ।

बाढी सबै बगाइदिएपछि चङ्गजुराई र पाटिया पथर गाउँका मानिस अलपत्र परेका भारतीय सञ्चार माध्यमले जनाएका छन् । त्रिपालमुनि अस्थायी आवासमा शरण लिएका गाउँलेहरु विगत पाँच दिनदेखि प्रदेश सरकार र जिल्ला प्रशासनबाट खासै सहयोग नपाएको गुनासो गरेका छन् ।

बाढीका कारण २७ जिल्लाका ६० लाखभन्दा मानिस प्रभावित भएका छन् । प्रिमनसुनमा वर्षापछि आएको बाढीबाट अरु हजारौँ मानिस विस्थापित छन् ।

बाढीबाट सबैभन्दा बढी पूर्वी होजाइ र काचर जिल्लाका दुई लाख भन्दाबढी प्रभावित भएको जनाइएको छ ।। बाढीमा ज्यान गुमाएका पीडितका परिवारलाई सरकारले जनही ४ लाख दिने यसअघि नै घोषणा गरिसकेको छ ।