काठमाडौँ– १५ औँ गोदावरी फूलको प्रतियोगितात्मक प्रदर्शनी बिहीबारबाट ललितपुरमा सुरु भएको छ । ‘रोपेर फूल गोदावरी, सजाऔँ घर आँगन वरीपरी’ नाराका साथ फ्लोरिकल्चर एशोसिएसन नेपालको आयोजनामा पुष्पमेला सुरु भएको हो ।

प्रदर्शनीमा व्यवसायिक स्टल ४९, प्रतियोगितात्मक स्टल २ र सूचनामूलक ४ गरी जम्मा ५५ वटा प्रदर्शनी कक्ष रहेको फ्लोरिकल्चर एशोसिएसन नेपालका अध्यक्ष मिनबहादुर तामाङले जानकारी दिए ।

मेलामा करिव ८० लाखको कारोबार हुने अपेक्षा रहेको उनले बताए । प्रदर्शनीमा सहभागी नर्सरी र फर्महरूले उत्पादन गरेको गोदावरी फूलको ५ वटा प्रजातिमा प्रतिस्पर्धा गराइने बताइएको छ । सयपत्री, मखमली तथा अन्य सिजनल फूल तथा बिरुवासमेत प्रदर्शनीमा राखिएको छ । अहिले फूल व्यापारको अवस्था उत्साहजनक रहेको र उत्पादनको तथा बिक्री पनि बढ्दै गएको एशोसिएसनका अध्यक्ष तामाङले बताए।

कोरोनाअघि पौने तीन अर्बकाे वार्षिक कारोबारको आँकडा रहेपनि कोरोनाका बेला १ अर्ब ६३ करोडमा व्यापार झरेको तामाङको भनाई छ । त्यसपछि भने अघिल्लो आर्थिक वर्षमा २ अर्ब बढिको कारोबार भएको र अहिले कारोबार बढ्दै गएको उनले बताए ।

गोदावरी फूलको व्यवसायिक प्रवर्द्धन गर्ने उद्देश्यका साथ मेला आयोजना गरिएको फ्लोरिकल्चर एशोसिएसन जनाएको छ । पुष्प मेला आइतबारसम्म चल्नेछ ।